Ordspel

Hei!

Martine — Tue, 11 Jan 2011 21:49:20 +0000

Hei!

Endeleg! Det tenkjer nok alle av dykk som sjekkar bloggen min kvar dag og alltid vert skuffa. Endeleg skal ho byrje å blogge att. Men eg må diverre skuffe dykk igjen. Men eg har ei gladnyhende! I høve at eg plutseleg skal gifte meg i sommar har eg og min utkåra laga ein ny blogg, ein såkalla bryllaupsblogg. Og det er her eg kjem til å fortsette å vere ein aktiv bloggar.

Bloggadressa er: hjertvikurke.wordpress.com

Altså ikkje så veldig ulik denne. Så berre slapp av, dette går fint! Snakkast!

Neglebit

Martine — Sat, 12 Jun 2010 23:08:23 +0000

I går hadde det seg slik at eg klemra meg noko hinsides i ei slik litt tung svingdør. Det var kveld. Eg gjekk ei sein låserunde, og ana fred og inga urovekkjande fare. Men i det eg skulle til “å ta med meg” døra og låse ho, vart ho rett og slett for rask for meg. “No skal eg vise ein gong for alle at eg er meir enn ei låvedør, og desto mindre tapt bak ei slik”, tenkte nok svingdøra idet ho small over ringefingeren min. Ho klarte dog ikkje å brekkje han, i det minste. Her må vi ta med alle dei positive momenta vi kan. Han skifta likevel fort farge, frå den såkalla “hudfargen” til det meir blålege, og væske spruta ut av tårekanalane. Eg sutra, og kontakta dei eg kjente på åstaden. Det vart slått fast at naglen var blå og moglegens burde bli laga hol i. Dette var eg skeptisk til, så eg treiv til meg ein ispose og sat med handa heva resten av den ulykksalige kvelden.

I dag hadde eg derimot fått motet på topp og sa til Helga: “Ta denne nåla, og et ho!”. Neida, det var ikkje det eg sa. Eg spurde fint om ho ville hjelpe meg å stikke hol i naglen min slik at blodet kunne få strøyme fritt.

Ho takka ja.

Odour Elimination

Martine — Thu, 03 Jun 2010 19:33:01 +0000

I dag kjøpte eg noko som gjorde at eg fekk ei kjensle av at eg er blitt vaksen. Eg gjekk på butikken og skaffa meg ein slik dings som ein har i do for at odøren ikkje skal slå deg i bakken. Ein slik ein festar nedi skåla. Den hadde ei grøn væske som lukta “outdoor fresh”. På engelsk heiter visstnok produktet odour elimination, men kva det heiter på nynorsk veit eg ikkje. Det var litt ekkelt å feste den, men etter berre eitt einaste nedtrekkingsførsøk, kjende eg meistringskjensla fløyme opp i meg: dette kan eg! Eg føretok meg ein kjapp liten kik, og det var forsynemeg såpeskum i vatnet òg. Håddu!

Pluss at det er varmt i vêret, pluss at eg har kjøpt meg ein ny kjole, pluss at eg var på ein liten roadtrip på den engelske landsbygda i går, pluss at eg elskar grey’s anatomy, pluss at livet er godt, pluss at eg bloggar!

For eit comeback!

dumt, då.

Martine — Tue, 19 Jan 2010 22:45:26 +0000

Eg gidd berre ikkje skrive noko fortida. Skulle ønske eg gadd, men eg gidd ikkje. Sorryasis.

Tubeaction

Martine — Sun, 13 Dec 2009 23:31:05 +0000

Eg såg eit homofilt par på tubestasjonen i Notting Hill Gate i dag. Dei råklina. Og då dei gjekk inn på tuben måtte han eine løfte han andre opp på setet. Veit de kvifor? Fordi han var ein dverg. Alt ein får sett i London.

Nytt innlegg

Martine — Mon, 30 Nov 2009 15:32:52 +0000

Ja, eg tenkte med meg at no må eg sjå å skrive eit siste innlegg i november. Det er berre i dag eg kan gjere det. Kvifor? Fordi i morgon er det DESEMBER! Det er rett ikkje til å tru. Her sit eg og høyrer på julemusikk, og tenker at det ideelle hadde vore å skulle heim til jul. Heime er det visst nok snøv. I London er det surt og kaldt og regn og forkjøling.

Og graut

Og ofring av blod for at kakene skal få sjå dagens ljos

(om de ikkje ser det, har eg plaster på styggefingren)

Og kamp med mitt favorittlag, Blackburn

Og kafèbesøk

Eg har altså hatt kjekke dagar! Den siste av mitt framifrå besøk reiste i dag, det var dumt. Men så er det jo berre kjempekort tid att til jul! O’ du heilage!

Ynskjeliste jula 2009 – som vert oppdatert langs med

Martine — Fri, 13 Nov 2009 22:31:37 +0000

Sidan mange andre gjer det, og sidan også eg har fått førespurnad om kva eg ynskjer meg, og fordi eg tykkjer det er storleg kjekt og stas at det nærmar seg jul, så slenger eg meg på ynskjelistebølgja.

iPod touch
Halvlang cardigan (gjerne mørkegrå eller blå eller grøn eller brun eller gul)
Tepresskanne
Bruktmarknadsting. Gå på vitjing til onkel på gjenbruk!
Heimelaga ting
Tursekk, 60 l. Til dømes ein slik
Bøker
Filmar
Fine ting
Musikk
Visesangbok
Spel (TP, Settlers, Blokus, Bohnanza, you name it! )
Kjekke ting
Hobbysaker
Kjolar og skjørt
Strømpebrøker
Sminke (eg tek etter søster mi, og byrjar å samle)
Minner
Koselege og morosame ting
Bilete
Ein gamal damesykkel
Plaster (eg er så peivete med desse knivane)
Super-/ullundertøy
Bidrag til eit par fine vinterskor
Ein stor trillekoffert!
Fint brevpapir
Kunst
Kjekke koppar

Det var det eg kom på i farta. Det kan godt tenkjast at det vert oppdatert etterkvart. Det vert det ja!

Ein annan praktisk ting. Sidan eg bur der eg bur, er det eigentleg greiast å få gåver når eg kjem heim, sjølvom det vil seie at eg ikkje får pakke opp så mykje på sjølve julaftan. Eg får berre så gruspøkjla mykje ting å drasse med meg heimatt til somaren viss alt kjem unødig bortover her.. På førehand takk!

Signe dagen!

Martine — Sun, 08 Nov 2009 17:19:19 +0000

Eg er atter på jobb. Kanskje eg skulle skifte bloggnamn til jobbebloggen. Men det gjer eg ikkje. I dag har det vore den såkalla remembrance-sunday. Då minnast vi alle dei som gjorde ein drabeleg innsats under krigen, men som ikkje kom frå det med livet i behald. Vi er òg særs erbødige ovanfor dei som overlevde og som faktisk er i live den dag i dag. Nokre av dei kom til kyrkja, og vi viste dei ære. Nokre av dei fekk også lov til å lese. Det gjorde eg òg. På engelsk. Framfor ei heil forsamling av veteranar frå 40-talet. Det var kjekt det, forsåvidt. Men fekk ikkje noko kompliment etterpå. Det hadde ikkje skjedd i Ørsta frikyrkje, I tell you!

Resten av dagen har gått med til oppvask for det meste. Og litt kyrkjekaffirestar. Tru det eller ei, trass i at det sikkert var 100 000 til kyrkje i dag, var der faktisk eit par hjørne att av kakene. Vi metta 100 000 og hadde fortsatt mat att. Er ikkje det evangelisk så veit ikkje eg, ass.

No på slutten er eg velsigna med ein kjekk kar som sit og spelar Grieg på flygelet vårt. Det er kjekt. Skulle berre ynskje det var eg som sat der på pianokrakken. Men det er det ikkje.

Alt vel.

Cambridge

Martine — Mon, 02 Nov 2009 21:47:22 +0000

Eg legg meg på den kule biletlina. Følg med

Her lærte Harry Potter seg å flyge på broomen sin. Kult! :

November

Martine — Sun, 01 Nov 2009 15:49:17 +0000

I dag er det november. Eg er forelaupig på jobb. Ute verkar det som at vêret endeleg har forstått at det er haust, så det har bestemt seg for å blåse litt. Det er kjekt. Det er fint med haust. Kjensla av å kunne ta på seg gode kle og gå ut i det sure vêret er god. Det er også kjekt å site inne og planleggje julegåver og snuse rundt på hobbybloggar i slikt eit vêr. For det er jo snart jul! Oppe i Oxford og Regent og dei andre streetsa har dei fått opp julelysa, og ventar berre på å kunne setje i kontakta ein av dei nære dagane. Då vert det stemning! Eg gleiar meg til førjulstid i London! Men førelaupig står eg her, på kjøkenet på kyrkja, og lengtar ut mot stormen.